علاج قوي كتير

المقالة أدناه لا تعبر بالضرورة عن وجهة نظر المدونة، إنما عن وجهة نظر كاتبها فقط، وإن كنا نتحمل تبعات نشرها

كتب: طوني الخوري (خاص تريلا دوت أورغ)

كيف ممكن نصدق انو رح يتفقوا الشباب على طاولة الحوار، بعدين على شو بدن يتفقوا ؟…

ما زال الحزب مسلح، والتيار متنح، والمستقبل مشرشح والقواتجي مخرف، والاشتراكي مضيع والكتائبي مغمض والباقي مهمش… فكيف بدن يتحاوروا وعلي شو ممكن يتفقوا… خلصنا بلا تنمير!!

ولكن، بعد في أمل انو يزمط البلد”الحبيب” طبعا من الكوارث يللي أكيد واصللا… العلاج فعال مدتو ٣ سنين بس، ما راح قول ٥ او خطة خمسية لأن كتار بيستعملووا و بكررووا شي اسمو خطة خمسية بلا ما يفهموا شو عم يقولوا… فخلينا على ٣ سنين أفضل..

العلاج يا اخوان ويا اخوات هو كما يلي:

١- وقفوا تحضروا نشرات الأخبار والبرامج السياسيي والاجتماعيي والدينييي خاصة، أو تسمعوا على الراديو أو تقروا بالجرايد وعلى الانترنت.. واستبدالا بمسرحيات وموسيقى و رسم وحفر وتنزيل وغنا ورقص…. وقد ما فيكن كتروا

٢- اذا تطبق البند الأول بحذافيرو ساعتا الأعصاب بتروق والفكر بيرتاح و بيزيد الشغل والقبض وبيخف النق و كل جماعة السياسيي ورجال ونسوان الدين بيصيروا بلا شغل.

٣

– ما تدرسوا ولادكن لا تاريخ ولا جغرافيا -(أصلا كتاب التاريخ مبعوص في)- ولا اي شي ممكن يطلعن سياسيين مستقبلا….ركزوا على العلوم كل العلوم خاصة البيولوجي حتي يصيروا يفهموا هيدا الجسد كيف بيشتغل و كيف اصغر الخلايا ونواتا بتشتغل بذكا رهيب، هيك بيصيروا يحترموا الجسد واهميتوا وقيمتو، وبيصيروا يعرفوا معنى خسارة انسان اي انسان وساعت ما بيعود حدا يقتل حدا تاني … فضلا انو بيروح من راسن الكبت، الجنسي طبعا.. وبصير اذا الولد شاف شي بز مرا ما ينشدق ويتهيج، بالعكس بيصير كأنو شاف اي لعبة عندو ياها بالبيت او بيبروني بنبسط لما بيشربا…

٤- منع الديلفيري بكل انواعو.. هيك الست بتطبخلا شي طبخا والمحروس بياكل اكل صحي وبتسكت مريم نور !

٥- بيعوا كل السيارات او صدرووا او خدووا عالكسر او حولووا موتورات للكهربا هيك بيصير في كهربا ٢٤ على ٢٤ و ٧ ع ٧ وبتنحل مشكلة السير … واستعملوا البيسيكلات لأن اتخن واحد فيكن شغلو حد بيتوا او ببيتوا فــ يهز طيزو ويسوق بيسيكلات او يمشي هيك بتروح الدهون والكوليسترول

وبتروق الأعصاب وبيبطل المخ مطلمس، وبيبطل كل واحد مفكر حالو مركز الكون ومنخلص من نغمة “عارف حالك مع مين عم تحكي!”

٦- منع اقتناء او حيازة رموز وطنية متل الأرزة او غيرها الله يخليكن لأن أصلا بعد في شي أرزتين باقيين وهني الوحيدين المظبوطين بس ارزاتكن متل القرنبيط بتعمل غازات فبلا روايح زيادة بيكفي مكبات الزبالة..

وكمان وقفوا النشيد الوطني وبلا ما نكذب على بعضنا…

٧- منع حيازة واقتناء الرموز الدينية و ماشابه حتى رموز التنجيم والتبصير متل الفغالي و زعيتر والحايك وإم جورج وأم وليد وغيرن… ويللي بدو يصلي ما في مانع بشرط بيصلي بقلب الكنيسة او الجامع مش بيوقف برا و بيجغل عالحريم…

بعد في كتير بس بعتقد لهون بيكفي كمرحلة أولى من العلاج… بلشوا فيا وبعدين منعمل تقييم او تقويم منشوف ايها اظبط.

بلشو فيا أحلا ما تروحوا بشي طيارة منكوبة متل هالوطن المنحوس وما يعود حدا يخبر!

بي أس: على سيرة الطيارة، الموضوع ملعوب فيه… يعني في بعصا كبيرة، كبيرة كتير لحد الانفجار… والشك عم بيزيد لأن يللي عم بديرو الأزمة يا اما مساطيل او مهابيل ما في حل تالت! بس مش الحق عليهن الحق علينا لأن نحنا المساطيل يللي انتخبنا هيك مهابيل… والله يستر

كل الناس عم تنظر، وقفت عليك؟ فقعلك نظرية..

comments

5 تعليقات

  1. كبير يا “دكتور” .. دخلك ما في عندك شي أسرع وأسهل وقابل للطبيق .. طب بديل يعني .. تحاميل بركي!!

  2. كتير حلو الموضوع
    بهنيك علي
    بيعجبني الموضوع بس يكون في مسبات ….بتفشلي خلقي

  3. ما تأخذنا يا سيد تريلا
    العتب على النظر والشغل
    كل مقال حتى أقرأه بدي شي ساعتين لانو بكون بالشغل مع المهندسين او بالاجتماعات.
    شو يعني فينا نكتب عندك وتنشرنا المقال ؟
    انا بعجبك بالشتيمة والكلام اللبناني القح من جورة زحلة.
    مش شتيمة الوسخة …
    الشتيمة المهضومة ويلي بتعبر ….

    • كثير حبيت الفكرة، إنو مثل ما في إعلام هادف في شتيمة هادفة …كثير حبيت، بدنا نروح شي مشوار على زحلة منبقى منحكيك

اضف رد

لن يتم نشر البريد الإلكتروني . الحقول المطلوبة مشار لها بـ *

*